ഈയാം പാറ്റകള്‍

മഴ പെയ്ത് പെയ്ത് കുതിര്‍ന്നൊരു ഭൂമിതന്‍

മാറിടം പൊട്ടി പിളര്‍ന്നു വന്നൂ

വ്യഥിതരാം ഈയാം പാറ്റകള്‍

മനസ്സിലെ മോഹമാം വീണമീട്ടി

മന്ദമായ് മേലെ പറന്നിടുന്നു

മുദിരാം ഈയാം പാറ്റകള്‍

ക്ഷണികരാം ഈയാംപാറ്റകള്‍

അന്ധകാരത്തില്‍ നിന്നകലുവാനോ

ഒരു ചെറുവട്ടം തേടിയലയുന്നു

അറിയാതെ ആഞ്ഞു പറക്കുന്നു വീണ്ടും

നേര്‍ത്ത വെളിച്ചം പരക്കും ദിശകളില്‍

പലവട്ടം ചുറ്റി വെളിച്ചത്തെ പുല്‍കുന്നു

പകരമായ് ചിറകുകള്‍ വീണിടുന്നു

ചിറകുകളില്ലാതെ വട്ടം കറങ്ങുന്നു.

ചിറകറ്റ പ്രാണിയായ് വീണീടുന്നു

ചിറകറ്റ പ്രാണിതന്‍ ദൗത്യമെന്തോ?

ചിതലിന്‍ പിറവി നല്‍കണോ?

ചിറകറ്റ പ്രാണികള്‍ മിക്കവാറും

ഇരകളായ് തീരുന്നു അന്നുമിന്നും.

മഹാലക്ഷ്മി.എന്‍.പി

അധ്യാപിക

സമൂഹം ഹൈസ്കൂള്‍ പറവൂര്‍